الحب - الشغل - الصداقة

الحب : شوف خيوو وخيتو كارميل ماكياتو ، انتو بالحب متقلبين وايد .. ما عندكم آراء ثابته اتجاه فكرة الحب أو صوب مشاعركم ، واساساً في منكم نوع ما يفهم بالحب خير شر وبعيد كل البعد عن المشاعر وهالحجي .. لدرجة توصل معاه إنه يتطنز على أبطال قصص الحب والافلام الرومانسية وغالباً تكون هالشخصية واقعية وايد وهم الشخصية الثانية منكم واقعية لكن تعتبر المشاعر شي مهم بحياتها ، بس هم كله ماخذه الموضوع بـ شكل funny .. مع إنك من النوع اللي تمدح وترفع بحبيب القلب إذا سوالك شي ، او حتى لو مو مسوي شي تقعد تمدحه وتصفصف هالكلام الحلو .. مو قلنالك نصاب !

الشغل : كونك شخصية إجتماعية وايد ومرنة واتكيف بسرعة ، فـ مجالات الشغل اللي تصلح لك وايد .. وأهمها المجالات اللي فيها اختلاط وتعامل مباشر مع الناس ، يعني ممكن التلفزيون ولا الإذاعة ، وهم بالفن ممكن تنجح كـ ممثل أو مطرب ، يعني عموما المجال الإعلامي بـ كل أنواعه . وهم مثل ما قلنا كونك نصاب وعيار تصلح تشتغل بالسلك الدبلوماسي ، وهم إذا عندك ميول سياسية من أمه تصلح ترشح روحك حق المجلس ! بما إنك إجتماعي ومجامل وتعرف تاخذ وتعطي .. وهم ترى لسانك طويل إذا عصبت .. مثل ما قلنا يعني ما ينخاف عليك !

الصداقة : اللي يرافجك .. ما يمل منك ! حده صدق من قال قعدتك ما تنمل ، شخصيتك الإجتماعية والحيوية واللي كلها نشاط تخلي الواحد وياك يحس إنه عايش وعنده طاقة يسوي كل شي ، وطبيعتك الإجتماعية تخليك تكسب شريحة كبيرة من الناس بفترة قياسية ، لأنك تدرعم بالقلب بسرعة بدون لا إحم ولا دستور يعني إذا شفت واحد بـ مرينا يمشي ويسلم على خلق الله .. تأكد إنه واحد من ربعك يالـ ماكياتو كيكيكي  .